أساتذتي ♥️

الحقيقة كنت عم شارك حلقة أساتذتي للكبير ياسر العظمة وعم علّق عليها, الرابط آخر المنشور صار، بس لاقيت انو أنا كمان بدي احكي عن أساتذتي..

أنا بقا يلّي علّموني كتار، وصعب ينعمل قائمة فيّون، بس بالروضة المعلمات علّمونا كل المبادئ بالحياة برا الأسرة بذكر منن الآنسة Rasha Al Khadra والآنسة جمانة والآنسة عزّة وأكيد مديرتنا الحبيبة القويّة ملداء الركابي، كانت أول أنثى مديرة بشوفا بالدنيا، سيدة واثقة فهمانة محبوبة منظّمة..

بالتعليم الأساسي مرّوا مجموعة أساتذة لايمكن تسميتن بأساتذة فقط، كانو مربّيين ومربّيات، بالأول ماجدة حربة مثال المعلمة يلي حاملة رسالة بسيطة، أنا مو جاي علّم أنا جاي ربّي.. بالثاني الهام يلي كانت تقلّي استنى رفقاتك لاتسبقن، ويمكن هي القاعدة فهمتا بعد عشرين سنة، انو مافي فايدة توصل لحالك لازم توصل مع الناس!

بالصف الثالث الأستاذ راشد العبد الله الحنون جداً يلي كان متحمّل حركتي الزايدة واندفاعي دوماً ويلّي خيرني آخر السنة بدّك بطاقة امتياز ولا تفوّق؟

بهالمرحلة كان في وسيم الشهابي، أهمّ استاذ علوم عرفتو سورية على ما أعتقد، شخصيّة جذابة قويّة محبّة عندا قضيّة وطموح، من وراه حبيت اسمي أكتر، كتير أثر فيي من عضويتي بلجنة الصحة المدرسيّة بالصف التالت ورايح.. 

ما بنسى الأستاذ حسّان تلمساني، يلي خلّى التاريخ والجغرافيا قصص حلوة استناها وخصوصاً التاريخ العربي يلي كان يخلّيه أكثر متعة بقصصو الجانبيّة ومقارباتو..

الآنسة رايقة حمدان، تحمّلتنا كتييير بأكتر فترة حرجة منراهق فيها، أنا عنجد بعتذر لكل المواقف الولاديّة اللي كانت فيها أم إلنا كمجموعة طلاب مشاغبين وشطورين بنفس الوقت

الأستاذ محمد عمرين، ملك اللغة العربيّة، ابتسامة ومحبّة وخوف علينا، بنفس الوقت كان رفيقنا

أما Nahi Sweid، كان شي ناهي عنجد، أسلوبو المحبب، تواضعو، لهفتو وتفانيه كانوا يجبرونا نأجل مياعتنا ونركز

كتار كانو بهالمرحلة، آنسة الفرنسي دارين الأنيقة، منير قرقش يلي خلّا الكيميا أغاني حلوة ويلي كان يذكرنا كل حصّة قديش عم يتعبوا أهالينا ليدرسونا.. الآنسة غُنوة آنسة الموسيقى الرقيقة يلي كانت تعزفلنا ع الأكورديون ونغنّي بيقولوا صغيّر بلدي،، آنسة الاجتماعيات حنان، يلي كانت تسميني أُستاذ وسيم، فواز شاهين المدير المبتسم دوماً ويلي كان يضل عم يحل مشاكل الطلاب ساعات وساعات..

وأخيراً من هالمرحلة أبو سليمان وأم سليمان، أذنة المدرسة، مثال للعيلة الصابرة المتعاونة والمتفانية لتعيش، تعلمت منن انو ما بيخجلو يشتغلو أي شي وبنفس الوقت يحكو سياسة ويعبرو وبمرحلة كانت كلمتن عند الادارة مابتصير تنتين.. أنا أول مرّة حدا حكالي عن أميركا وتغوّلها هو أبو سليمان بالمناسبة وكان قصدو عن سياسة القطب الواحد والرأسمالية بس بكلمات بسيطة جداً..

بالمرحلة الثانوية، ثانوية الدكتور سامي الدروبي، اسم الثانوية كان بيعنيلي وكنت كتير فخور انو أنا أمين وحدة الشبيبة لثانوية د. سامي الدروبي شيخ المترجمين العرب وواحد من أهم عرابي العلاقة الأدبية بين الشرق والعرب، بهي المدرسة مرّت مجموعة أساتذة محترمين جداً، اللغة العربية الجميلة مع أحمد علي جان، الفلسفة بالشكل يلي حبيتو ويلي ما كنت ادرسلها دراسة بل مجرد متعة تفكير مع المعلّم جهاد محمد، الأستاذ نبال الخطيب ملك التاريخ وملك النجاح، كان قادر يتنبّأ بذكاء بالأسئلة تبع امتحانات الثانوية دوماً، الموجهين مزيد وباسل ميهوب كانو يعاملونا كزملاء واخوة، داعمين وأصدقاء..

بكليّة العلوم السياسيّة، بدي احكي عن دكتور واحد، مالو ند أو شبيه بكل الكليّة وبكل جامعة دمشق، وغالباً بكل سورية، الدكتور سمير اسماعيل، العراب الفكري وصاحب الفضل بحبّة هالوعي يلي منمتلكا لما حولنا من مجتمعات وسياسة

بالجامعة اليسوعيّة الحقيقة انو في مجموعة دكاترة لايُمكن اغفال دورن بتشكيل الوعي منن د عيسى دياب الأكاديمي الجريء، د حسين ابراهيم أكثر من تعرفتُ اليه تواضعاً وتهذيباً في عُمري، د ادغار الهيبي الرصانة العلميّة والأكاديميّة المحبّبة، الدكتورة اللطيفة الهام كلاب يلي بعتبرها استمرار لحكاية لبنان الحلوة بكل تفاصيلها، والأكيد الأكيد البروفيسور Roula Talhouk يلي كانت الشريكة والداعمة والأكاديميّة بكل مراحل الماستر ويلي علّمتنا الكتير، مثال للأنثى الملتزمة بقضايا بلدها لو خسرت الدنيا، تعلّمت منها المساعدة اللامشروطة وانو الحُب قبل باقي الافتراضات.

بعض الأستاذة أيضاً يلي أخدت معن صفوف أكاديميّة بالجامعة اللبنانية الأميركية وبعض الفرص الرائعة بالجامعة الأميركية ببيروت والجامعة الأردنيّة بعمان وكلية الإعلام بدمشق وأهم من فيها د عربي المصري.. وجامعة انسوپريا بايطاليا حيث التقيت لمرّة أخرى بالرائع أنطوان مسرّة، صح لقاءات قليلة ببرمانا بلبنان وبايطاليا ضمن برنامج مشترك بس الحقيقة انو حكيو وخلاصاتو كانت تفاصيل مهمّة بطريقي وطريق كتار

هدول بعض الأساتذة أصحاب الفضل، ولاشك في العشرات بس هدول يلي معلقين بالذاكرة وتاركين مطرح، وفضلت احكي عن الأساتذة بالمجال التعليمي والأكاديمي لأنو أكيد في العشرات من الأساتذة بالمجال العام وأكيد رح يكون في فرصة لتناول فضلن عليي 

بمناسبة عيد المعلم بقول لكل شخصية من هالشخصيات انّو الفضل هو دين علينا لنرجع نعطيه ونبني وما نمل ♥️ 

وسيم السخلة، 17/3/2022